मुंबई : राष्ट्रवादी काँग्रेस पक्षाच्या रूपाली चाकणकर यांनी २९ जुलैला महिला प्रदेशाध्यक्षा म्हणून पदभार स्वीकारला.
राष्ट्रवादी काँग्रेसचे प्रदेशाध्यक्ष आमदार जयंत पाटील यांनी २७ जुलैला चाकणकर यांची महिला प्रदेशाध्यक्षा म्हणून नियुक्ती जाहीर केली होती. २९ जुलैला चाकणकर यांनी मुंबई येथील प्रदेश कार्यालयात प्रदेशाध्यक्षा म्हणून पदभार स्वीकारल्यानंतर माध्यमांशी संवाद साधला.
‘सामान्य लोकांच्या मनातील खदखद आणि प्रश्नांवर सरकारला जाब विचारला जाईल’, अशी स्पष्ट भूमिका नूतन प्रदेशाध्यक्षांनी मांडली. त्या म्हणाल्या, ‘कोण पक्ष सोडून गेले म्हणून पक्षाचे काम थांबत नाही. ३६५ दिवस आव्हाने सुरूच असतात. निश्चितच चांगल्या पद्धतीने काम केले जाईल. जे आव्हान येईल त्याला तोंड देण्याची आमची तयारी असणार आहे. दोन दिवसानंतर संपूर्ण महाराष्ट्रात दौरा सुरू करून संघटना चांगल्या पद्धतीने बांधली जाईल.’
या वेळी आमदार विद्या चव्हाण, मुंबई महिला अध्यक्षा सुरेखा पेडणेकर, मुंबई महापालिकेतील गटनेत्या राखी जाधव, युवती अध्यक्षा अदिती नलावडे आदींसह मुंबईतील महिला पदाधिकारी मोठ्या संख्येने उपस्थित होत्या.